У Воршы затрыманы ўладальнік мясцовага копі-цэнтру Дзяніс Сімановіч. Гэтую інфармацыю пацвердзіў праваабарончы цэнтр «Вясна».
У мінулым месяцы да Дзяніса Сімановіча ў копі-цэнтр завіталі супрацоўнікі ГУБАЗіку. Іх увагу прыцягнулі некалькі значкоў з выяваю жоўтага поля з блакітным небам. Такія сувеніры Дзяніс паспеў таксама падарыць некалькім сваім знаёмым. Сімановіча дапыталі і адпусцілі дадому.
А 29 красавіка Дзяніса запрасілі на гутарку ізноў, адкуль ён ужо не выйшаў. Дзяніс паспеў патэлефанаваць блізкім і паведаміў, што яго арыштавалі на 10 сутак, нібыта за пікетаванне. У той жа час у копі-цэнтр працягваюць заглядваць супрацоўнікі ГУБАЗ, іх цікавіць, якая прадукцыя там вырабляецца і што менавіта прадаюць людзям.
