У Оршы сёння нарэшце судзяць Вячаслава Лютынскага і Дзмітрыя Матусевіча. Хлопцаў затрымалі яшчэ ў студзені за спробу спаліць дзяржаўны сцяг і чатыры з паловай месяцы яны былі на віцебскім ІЧУ ў чаканні суда. Суд распачаўся а 10-00, а пазней быў абвешчаны перапынак да 14-30. Пасля перапынку ў судзе павінны распачацца спрэчкі бакоў.
Другі суд адбываецца ў Дуброўна. Там за клевету судзяць Сяргея Гутарэнка. Падрабязнасці яго справы нам пакуль не ведомыя акрамя таго, што гэта таксама тычыцца сітуацыі вакол выбараў і рэпрэсіяў. Тут суд распачаўся раніцай і быў абвешчаны перапынак да 14-00. Падобна, што ў абодвух выпадках прысуды будуць вынесеныя ўжо сёння.
Нарэшце нам сталі вядомыя вынікі суда над Аляксандрам Несцеравым. Нагадаем, што суд над ім адбыўся 31 траўня па абвінавачанні ў абразе прадстаўніка ўлады. Наколькі нам стала вядома, яшчэ да выбараў ён абразіў двух міліцыянтаў з Маладзечная - такая была яго рэакцыя на бойку паміж міліцыянтамі і ўдзельнікамі перадвыбарчага мерапрыемства. Тады пад час патасоўкі міліцыянт дастаў пісталет. Суддзя Кохава, якой найчасцей аддаюць зараз палітычныя справы асудзіла Несцерава на 2,5 гады "хіміі".
