Гаворка ідзе пра сядзібу Цюндзявіцкіх у вёсцы Галошава талачынскага раёна. Яна была ўзведзена мясцовымі памешчыкамі ў 19 стагоддзі. Выкарыстоўвалася, у тым ліку, як школа ў 20-м стагоддзі. Але са змяньшэннем вясковага насельніцтва стала занепадаць. У 2021 годзе ўвесь сядзібна-паркавы комплекс патрапіў у спіс аб'ектаў, якія мусілі быць знесеныя. Не зважаючы на дастаткова прыстойную захаванасць будынка і парка вакол яго.
Нашчасце, чыноўнікі адумаліся і замест зносу ўвесь комплекс дадалі ў спіс гісторыка-культурных каштоўнасцяў. А ў канцы жніўня для сядзібы распрацавалі і зацьвердзілі ахоўную зону. То бок, будынак не толькі нельга знесці, яшчэ і тэрыторыю вакол яго будуць ахоўваць на дзяржаўным узроўні. У ахоўную зону ўвайшлі рэшткі парка, сам будынак сядзібы, рэшткі флігеля і дзве гаспадарчыя забудовы.
