5 сьнежня ЗША ўнеслі ў санкцыйны спіс Беларусі 8 фізічных асобаў і 11 кампаній. Пра гэта паведаміла Міністэрства фінансаў ЗША.
Сярод тых, хто цяпер апынуўся ў спісе — уладальнік кампаніі «Амкадор» Аляксандр Шакуцін. На яго накладзеныя персанальныя санкцыі, якіх ён удала пазбягаў доўгі час.
Аляксандр Шакуцін паходзіць з Вялікага Бабіна ў Аршанскім раёне, дагэтуль ён спраўна абыходзіў санкцыі, а свае выдаткі, як казалі некаторыя крыніцы, пакрываў наўпрост з бюджэту Беларусі.
Хоць Шакуцін адмаўляе свае шчыльныя сувязі з Лукашэнкам, біяграфія галавы «Амкадора» гаворыць адваротнае. Шакуцін уваходзіў у Савет Рэспублікі 4 і 5 скліканняў, куды, як вядома, праз непразрыстасць працэдуры выбараў і зацвярджэнне шэрагу працэсаў Лукашэнкам выпадковы чалавек не трапляе. Акрамя таго, у 2020 годзе Шакуцін быў сярод запрошаных гасцей на «таемнай інаўгурацыі», ездзіў з Лукашэнкам да ягонай цёшчы збіраць бульбу, лятаў з ім у Эміраты.
Пры абгрунтаванні ўвядзення санкцый адзначалася, што Шакуцін атрымлівае выгаду ад падтрымкі рэжыму Лукашэнкі ў выніку прыватызацыі дзяржаўнай уласнасці, а таксама з’яўляецца сябрам арганізацыі «Белая Русь», якая адкрыта шмат гадоў падтрымлівае Лукашэнку.
Раней беларускія расследнікі высьветлілі, што ў Нямеччыне ў Шакуціна ёсьць кампанія, якая працягвае функцыянаваць і прыносіць прыбытак, у абыход санкцый.
Новыя амерыканскія санкцыі прадугледжваюць блакаванне актываў у выпадку, калі яны знаходзяцца на тэрыторыі ЗША, а таксама арганізацый, якія на 50% і больш належаць названым у спісе асобам або кампаніям. Для тых, хто супрацоўнічае з падсанкцыйнымі асобамі і кампаніямі, гэта пагражае другаснымі санкцыямі.
Насамрэч невядома, ці мае Шакуцін хоць нейкія актывы ў Злучаных Штатах. Але на рэпутацыю ягонага бізнэсу ў любым выпадку можа паўплываць тое, што яго лішні раз узгадалі сярод спонсараў непрызнаных уладаў.
