«Гол Сяргея Мельніка са штрафнога ў браму „Баранавічаў“ адметны ня толькі прыгажосьцю, але й лічбай. Гэтае ўзяцьце брамы стала для „Старту“ юбілейным, 600-м у І лізе першынства Беларусі за ўвесь час Незалежнасьці», — піша блог «Радыё Аршыца», публікуючы порцыю статыстыкі пра выступленне каманды.
Аршанцы пры гэтым не заўсёды выступалі ў Першай лізе, якая з’яўляецца другім узроўнем беларускага футболу. Доўгі час наша каманда гуляла толькі на трэцім, а ў пачатку 00-х праз фінансавыя і арганізацыйныя праблемы нават у першынстве Віцебскай вобласці, які быў адным з падразьдзелаў чацвертага ўзроўню.
Калі б не тыя акалічнасці, аршанцы дасягнулі бы юбілейнай лічбы нашмат раней. З іншага боку, варта адзначыць, што ўжо 10 гадоў запар «Ворша» трымаецца ў Першай лізе, займаючы месцы ў другой палове турнірнай табліцы.
Тэлеграм-канал прапанаваў чытачам яшчэ раз паглядзець юбілейны гол, а ў дадатак — трапны боц Глеба Жалезнікава, які адкрыў для аршанцаў сёмую сотню і можа прэтэндаваць на лаўры аднаго з найлепшых галоў бягучага беларускага сезону.
