У 9-м туры Першай лігі «Ворша» прымала на сваім полі барысаўскі БАТЭ-ІІ. З самага пачатку сустрэчы перавагай завалодалі аршанцы. Яна не была яўнай, і ўсё ж адчувалася, што аршанцы бліжэй да голу. Так і сталася — Дзмітрый Тамэла адкрыў лік на 17-й хвіліне.
Пад канец першай паловы сустрэчы часцей сталі атакаваць барысаўчане. Узнік кур’ёзны гол, аршанцы не датрымаліся да перапынку. Звычайны закід наперад скончыўся тым, што нападнік БАТЭ-ІІ не трапіў галавой па мячы, і той, не кранаючы брамніка Ігнатовіча, уляцеў у сетку брамы. Аршанскі вартавы быў засьпеты зьнянацку і дэзарыентаваны нападнікам супернікаў.
У другой палове ні аршанцы, ні барысаўчане не рэалізавалі сваіх магчымасцяў. Нічыя 1:1. Для аршанцаў гэта ўжо трэцяя запар нічыя.
«Ворша» застаецца на 13-м радку табліцы, але яшчэ згуляныя не ўсе паядынкі ў туры. Таму ў выпадку перамог ніжэйшых каманд аршанцы могуць упасці.
Таксама ў гонар Дня дзяцей аршанскі клуб зладзіў футбольнае свята, у якім прынялі ўдзел і прадстаўнікі клуба.
