У 15-м туры першынства Першай лігі Рэспублікі Беларусь у футболе «Ворша» гуляла ў Менску супраць юнацкай зборнай Беларусі (да 17 гадоў), якую федэрацыя ўключыла ў спіс удзельнікаў чэмпіянату на гэты год.
Першая палова сустрэчы скончылася ўнічыю 0:0. Невядома, колькі трывогі за канчатковы вынік было ў сэрцах аршанцаў у перапынку ў раздзявальні, затое дакладна ясна, што на пачатку другой паловы сустрэчы гэтай трывогі стала значна болей. На 49-й хвіліне гулец юнацкай зборнай адкрыў лік.
Аршанцам удалося зраўняць лік толькі на 90-й хвіліне пасля ўдару Дзмітрыя Тамэлы. Агулам у паядынку аршанцы часцей атакавалі, стваралі моманты, але вызначыцца ўдалося адно ў канцы сустрэчы. Тамэла прыняў мяч на левым краі брамніцкай зоны і трапна прабіў з блізкай дыстанцыі, абаронца не паспеў яго накрыць. А на 90+3 хвіліне Тамэла прабіў з лініі карнай пляцоўкі — перамога 2:1!
Пасля гэтага гульцы юнацкай каманды стварылі небяспечны момант, але Андрэй Ігнатовіч уратаваў «Воршу» і захаваў для блакітна-чорных тры пункты.
