Канал «Документальное прошлое», які спецыялізуецца на даследаваннях Дзяржаўнага архіва Расеі, у каталогу (Ф.Р-5446. Оп.150. Д. 2008. Л.94.) знайшоў цікавыя дакументы пра хасідаў. З нашым краем гэта мае прамую сувязь, бо менавіта ў Лядах на Дубровеншчыне дзякуючы рабіну Шнеуру-Залману ўзнік юдзейскі рух Хабад, які ў дадзены час з’яўляецца самым аўтарытэтным у хасідскім свеце.
Цэнтр перамясціўся ў Любавічы, адкуль і пайшоў панятак «любавіцкія хасіды», але з поўным правам іх можна было б называць і лядоўскімі, а ў будучыні ў Лядах неабходна зрабіць як мінімум памятны знак у гонар рабіна Шнэўра-Залмана і сінагогі, якая тут была. Яны ўславілі Ляды на цэлы свет.
На фота заключэнне Мінкульта СССР ад 2 жніўня 1989 года ў сувязі з прапановай пабудовы хасідскага паломніцкага цэнтру ў сяле Любавічы Смаленскай вобласці.
Любавічы былі адным з цэнтраў развіцця хасідскай школы Хабад, месцам пражывання і спачывання некалькіх кіраўнікоў гэтай рэлігійнай школы. Прапановы спрасціць пілігрымку ў Любавічы пачалі паступаць у СССР па меры паляпшэння адносін з ЗША (дзе з 1950-х гг. знаходзіўся цэнтр Хабаду).
Аднак Мінкульт СССР не быў у захапленні ад гэтай ідэі і шукаў прычыны для адмовы. Савет міністраў інфармаваў, што «школа рабінаў» у Любавічах спыніла існаванне ў 1912 годзе (хоць лінія правадыроў Хабада не перарывалася) і могілкі «дзе ён, як мяркуецца, пахаваны, знаходзяцца ў нездавальняючым стане». Таксама, на думку Міністэрства культуры, «мясцовасць у раёне вёскі Любавічы недастаткова добраўпарадкавана, на гэтай тэрыторыі няма помнікаў гісторыі і культуры і іншых славутасцяў».
