Беларускія геолагі пачалі рабіць глыбокую параметрычную свідравіну глыбінёй 1350 м паблізу аграгарадка Ходцы, што ў Сенненскім раёне.
Па выніках будуць атрыманыя звесткі пра мінеральны склад наяўных запасаў мінеральных рэсурсаў на дадзенай тэрыторыі, патлумачыў намеснік міністра Міністэрства прыродных рэсурсаў і аховы навакольнага асяроддзя Беларусі Віктар Галанаў, піша belmarket.by.
Спецыялісты прааналізавалі архіўныя звесткі і прыйшлі да высновы: свідраваць трэба на тэрыторыі Аршанскай упадзіны — яна мае асаблівую геалагічную будову. І ёсць усе перадумовы, каб тут знайшліся мінеральныя рэсурсы.
Пазьней у лабараторыях вызначаць хімічны і геалагічны склад узятай са свідравіны пробы. На аснове канкрэтных даных пра мінеральны склад можна будзе выказаць меркаванне наконт карысных выкапняў, якія ёсць у нетрах гэтае тэрыторыі. Перадумовы, каб знайсці там нафту, ёсць, лічаць дзяржаўныя навукоўцы.
На гэты момант прасвідравана ўжо 22 метры. Свідравіна «Аршанская 101» стане першай, якая выкрые крышталічны фундамент у межах даследаванай тэрыторыі. Бурэнне плануецца завяршыць у 2025 годзе.
