Як мы згадалі ў нашай папярэдняй публікацыі, Дубровенскі раён летась стаў найбольш крымінальным у Віцебскай вобласці, калі браць лагічны для такога спісу паказнік колькасці злачынстваў на душу насельніцтва.
Такім чынам, на Дубровеншчыне ўчынілі 1184 злачынствы на 100 тысяч асоб.
Але ці заўсёды было так? Ці, можа, на Дубровеншчыне толькі летась рэзка падскочылі лічбы крыміналу?
На жаль, даводзіцца канстатаваць, што Дубровеншчына — адзін з самых дэпрэсіўных раёнаў Рэспублікі Беларусь, — яшчэ і даўно адзін з самых крымінальных. Яшчэ ў 2015-м ён саступіў толькі Віцебскаму і Шумілінскаму, заняўшы 3-е месца ў сумным спісе, а ўжо ў 2018-м годзе апярэдзіў абодва. У 2019-м саступіў у рэйтынгу толькі Шумілінскаму, а ў 2020-м і 2021-м — толькі Віцебскаму. Віцебскі быў у лідэрах і ў 2022-м, і тады ж рэзкі пад’ём адбыўся ў Сенненскім раёне. Прычым, што цікава, тады паказнік крыміналу на Сенненшчыне нават зменшыўся, але ў іншых раёнах зменшыўся больш. Таму гэты раён стаў 2-м, а Дубровенскі 3-м. І вось у 2023-м Дубровеншчына зноў узначаліліа сумны рэйтынг.
Пры гэтым у паказніку адноснай частаты злачынстваў Дубровенскі раён крыху «ачысціўся». Дзевяць гадоў таму на сто тысяч насельніцтва тут прыходзілася 1350 злачынстваў, а цяпер 1184.
