У Дубровенскім райвыканкаме прайшло пасяджэнне, дзе ўдзельнікі канстатавалі суцэльныя няўдачы ў жывёлагадоўлі. Так, за мінулы год ніводная гаспадарка не выканала ўсе дзевяць ключавых паказчыкаў, якіх планавалася дасягнуць. Не выкананы нормы па вытворчасці малака і мяса, дапушчана агульнае зніжэнне колькасці кароў на 1097 галоў, у тым ліку дойнага статка — на 332 каровы, у шэрагу гаспадарак значна знізіліся ўдоі, упала якасць і таварнасць малака.
Вынікі галіны аказаліся яшчэ ніжэйшымі, чым былі ў 2023 годзе, хаця яго ў свой час райвыканкам таксама называў «правальным» для жывёлагадоўлі.
Вінаватымі за недастаткова высокія паказчыкі прызналі спецыялістаў сельгаспрадпрыемстваў. Прынята рашэнне штомесяц кантраляваць іх работу ў адстаючых гаспадарках.
Самай лепшай па выніках мінулага года была прызнана гаспадарка ААТ "Праўда-С". Дарэчы, менавіта там у дадзены момант вядзецца будаўніцтва новага сучаснага жывёлагадоўчага комплекса. Другі такі комплекс пачалі будаваць у КУСГП імя Чарняхоўскага. Пра неабходнасць удасканалення тэхнічнай базы для больш слабых прадпрыемстваў на паседжанні райвыканкама не згадвалася.
