14 лютага жыхар Віцебска паведаміў у міліцыю аб знікненні рэчаў і прадуктаў харчавання з яго дачнага дома ў вёсцы Заольша Лёзненскага раёна. Агульная сума скрадзенага склала каля 700 рублёў. Супрацоўнікі міліцыі ўстанавілі, што ў дом, дзе ўзімку ніхто не жыў, злодзей пракраўся праз акно. Па гэтым факце была ўзбуджаная крымінальная справа па ч. 2 арт.205 Крымінальнага кодэкса Рэспублікі Беларусь (крадзеж з пранікненнем у жытло).
Падчас следча-вышуковых мерапрыемстваў ва ўзаемадзеянні з Руднянскай паліцыяй высветлілася, што падазраваны хаваўся ў суседняй дзяржаве. Гэта беларус, які раней жыў у Чашніцкім раёне, але пасля здзяйснення серыі крадзяжоў вырашыў "адседзецца" ў Расіі. Цяпер ён "сядзіць" у віцебскім ізалятары часовага ўтрымання, а міліцыя правярае яго на дачыненне да іншых падобных злачынстваў у рэгіёне.
Дачныя крадзяжы - з'ява сезонная, і, на жаль, перыядычная. Таму міліцыя звяртаецца да жыхароў Лёзненскага і сумежных раёнаў з просьбай паведаміць, калі з іх дачных дамоў апошнім часам нешта знікла. Нават калі яны не паведамлялі пра гэта своечасова па тэлефоне 102.
