Аршанцы 9-га жніўня гулялі ў гасцях у Смалявічах супраць мясцовай каманды. Перад стартам 2-га кола 1-й лігі Беларусі ў "сіня-белых" была доўгая чорная паласа - 8 запар пройгрышаў, калі не ўлічваць тэхнічную перамогу над "Кобрынам". Толькі няўдачы таго ж "Кобрына" і "Рэчыцы" дазволілі аршанцам не апусціцца ніжэй за 14-е месца ў табліцы.
Гульня з серадняком лігі "Смалявічамі" не абяцала нашай камандзе нічога асабліва пазітыўнага. Ход гульні - таксама. Аршанцы зноў прапусцілі хуткі мяч - на 17-й хвіліне знаны бамбардзір ніжэйшых беларускіх ліг Аляксей Хадневіч увагнаў першы мяч у браму гасцей. На 30-й Андрэй Кухаронак павялічыў перавагу "Смалявічаў". Калі на старце другой паловы сустрэчы Ягор Сямёнаў зрабіў лік 3:0, то ўсім падалося, што "Оршы" ў чарговы раз не пазбегнуць разгрому. Але гаспадары адчулі набліжэнне перамогі і расслабіліся, чым аршанцы і скарысталіся. На 62-й хвіліне навічок "Оршы" Максім Разумаў скараціў адставанне ў ліку. А асноўныя падзеі прыйшліся на канец паядынку. На 83-й Антон Смірноў робіць лік 3:2, а на 90-й Аляксей Казарын 3:3!
