На чэмпіянаце свету па лёгкай атлетыцы, які пачнецца ў кітайскім Пекіне 22-га жніўня, Аліна Талай выступіць на дыстанцыі 100 метраў з бар'ерамі.
Як дасведчаная спартсменка, маральна я ўжо гатовая да спаборніцтваў. Самае галоўнае - перад стартам злавіць патрэбную хвалю, калі ты ўнутрана абсалютна спакойная і табе не перашкаджаюць ніякія староннія думкі.
Я ўжо выступала два гады таму ў Кітаі, таму ведаю, да чаго мне там трэба рыхтавацца. Гарачы мясцовы клімат мяне ніколькі не палохае: цяпер у Аўстрыі, дзе я трэніруюся, стаіць спёка пад сорак, так што, умовы максімальна набліжаны да пекінскіх. У той раз у Пекіне я засталася пад вялікім уражаннем ад мясцовага алімпійскага стадыёна. Там пануе невымоўная энергетыка, тысячы людзей на трыбунах, і ўсё актыўна хварэюць! Мне ўжо не церпіцца хутчэй туды вярнуцца зноў і выйсці на бегавую дарожку.
Чэмпіянат свету — найважнейшы старт сезона для мяне. Але я не накручваю сябе гэтым. Галоўнае — выйсці і добра зрабіць сваю справу. Нядаўна на нацыянальным чэмпіянаце Аўстрыі я адолела 100 метраў з бар'ерамі за 12,86 секунды. Нядрэнны вынік, які ўсяляе надзею, што і ў Пекіне ўсё атрымаецца.
Мне вельмі прыемна, што мае перамогі радуюць сотні маіх заўзятараў па ўсім свеце. Яны так шчыра за мяне хварэюць: і калі ў чарговы раз перамагаю, і калі прайграю — застаюцца са мною. Вельмі важна, каб у цяжкія моманты жыцця, заўсёды знайшоўся хтосьці, хто зможа цябе патрымаць.
Мяне рухаюць наперад цікаўнасць і прага жыцця. Кожную раніцу я ўстаю з радасцю: не церпіцца даведацца, а што мяне чакае наперадзе? Таму ўсім нашым заўзятарам я б пажадала радавацца кожнаму пражытаму дню і заўсёды заставацца сабой, не прагінаючыся пад абставіны, як бы цяжка часам не было!
