У паўфінальным забегу на 100 метраў з бар'ерамі Талай стала 3-й і паказала выдатны час - 12,70 секунды, што дазволіла ёй адабрацца ў вырашальны забег па дадатковых паказчыках. У фінале Аліна бегла з найлепшымі спрынтаркамі свету, з імі ж праз год яна мусіць змагацца за медалі Алімпійскіх гульняў у Рыа-дэ-Жанэйра. Але тое будзе праз год, а выклік быў ужо цяпер. І Аліна справілася з хваляваннем і ўсімі праблемамі. Аршанка ўсталявала новы рэкорд Беларусі - 12,66 секунды і стала бронзавым прызёрам чэмпіянату свету!!!
Чэмпіёнкай стала Даніэлле Уільямс з Ямайкі - 12,57 с, срэбраны медаль у Сіндзі Роледэр з Нямеччыны - 12,59 с. Пры гэтым Талай на 0,01 апярэдзіла амерыканку Браяну Ролінз з ЗША і на 0,02 Ціфані Портэр з Вялікабрытаніі - сваіх даўніх прынцыповых суперніц.
Рэдакцыя сайту orsha.eu шчыра віншуе Аліну Талай з вялікім поспехам у кар'еры і жадае спартоўцы надалей рухацца толькі наперад!
