У параўнанні з іншымі гарадамі краіны, аршанскія заўзятары спорта вельмі актыўныя. І на самім кольным стале і эксперты і гледачы прызналі, што наведваемасць для Оршы не самая балючая праблема, але ж ёсць куды развівацца яшчэ. І пытанне гэта не толькі самой папулярызацыі спорта, але і прыцягнення да спорта большых сродкаў, як праз продаж квіткоў, так і праз продаж спадарожных тавараў на саміх мерапрыемствах.
У першай частцы кольнага стала перад прысутнымі выступілі эксперты. Першым выступіў спартовы журналіст Арцём Сізінцаў, які публікаваўся ў шмат якіх друкаваных выданнях і радыё, у тым ліку спецыялізаваных на спорце. За сваё жыццё ён аб'ездзіў шмат якія стадыёны і ў Беларусі, і суседніх краінах, і краінах далёкага замежжа. Ён апісаў пытанне ўвогуле. Па яго меркаванні на спаборніцтвах у Беларусі і ў Оршы ў прыватнасці не хапае святочнай атмасферы і інфраструктуры. Цікавасць да роднага футбольнага клуба павінна падагравацца актыўна, а людзі павінны ісці на стадыён не толькі каб паглядзець на супрацьстаянне спартсмэнаў, але і адчуць атмасферу свята ды патраціць з карысцю свае грошы. Долю з грошай жа будуць мець самі спартовыя клубы.
Другімі выступалі мэнэджары футбольнага клуба "Крумкачы" - спецыяліст па рабоце з заўзятарамі Аляксей Важнік і прэс-аташэ клуба Максім Паршута. Мінскія госці адзанчылі, што Орша мае выдатнейшыя стартавыя пазіцыі для папулярызацыі спорта - значна лепшыя чым мелі Крумкачы, калі заявіліся ў чэмпіянат краіны - таму і вынік працы можа быць яшчэ больш паспяховы. Самі ж Крумкачы за два гады актыўнай працы змаглі з 0 дацягнуць наведваемасць сваіх матчаў да 70% ад колькасці месцаў на стадыёне.
У канцы мерапрыемства з зацікаўленых была створана рабочая група, якая ў хуткім часе агучаныя прапановы прааналізуе і накіруе зацікаўленым службовым асобам горада. Адна з прапановаў - стварэнне грамадскага прэс-цэнтра для аднаго са спартовых клубаў горада. Які будзе бясплатна дапамагаць пакуль не называемаму клубу прыцягваць людзей на трыбуны і ўвогуле папулярызаваць гэты клуб і яго гульцоў.
На фота: Арцём Сізінцаў
На фота: Аляксей Важнік
На фота: Максім Паршута
