У Віцебскай вобласці павысілі адзіны падатак для індывідуальных прадпрымальнікаў і фізічных асоб. Рашэнне абласнога Савета дэпутатаў апублікавана на нацыянальным прававым інтэрнэт-партале.

Найбольшы падатак ўводзіцца для бізнесоўцаў, якія прадаюць аўтатэхніку па-за гандлёвымі аб'ектамі Віцебска, - 388 рублёў за месяц.

За гандаль харчовымі таварамі (за выключэннем алкагольных напояў і піва) налічваецца падатак у памеры 104 рублі на месяц. У гэты пункт не ўваходзіць продаж хлебабулачных і мясных вырабаў, мяса, гародніны і г.д.

А вось падатак на раздробны гандаль у Віцебску хлебабулачнымі вырабамі, малочнай прадукцыяй, агароднінай, пладамі, ягадамі, кавунамі і т.п. складзе 78 рублёў за месяц. Больш заплацяць прадпрымальнікі, якія гандлююць у абласным цэнтры мясам, птушкай, вэнджанінай, кансервамі, - 155 рублёў за месяц.

Як правіла, у буйных гарадах рэгіёну - Наваполацку, Оршы і Полацку, падатак меншы, чым у абласным цэнтры Віцебску, а ў іншых населеных пунктах расцэнкі ніжэй. Напрыклад, за гандаль харчовымі таварамі ў буйных гарадах Віцебшчыны неабходна заплаціць падатак 91 рубель, а ў іншых населеных пунктах - 73 рублі.

Для ІП, якія вырабляюць на замову вопратку і абутак або якія займаюцца іх рамонтам, прадугледжаны паніжальны каэфіцыент у памеры 0,5 да стаўкі адзінага падатку. З поўным спісам дзеючых памераў ставак адзінага падатку ў Віцебскай вобласці можна азнаёміцца на сайце Нацыянальнага прававога партала.