На Цэнтральнай плошчы Оршы каля Дома гандлю 12-га сакавіка а 13:00 прызначаны мірны пратэст супраць Дэкрэта на дармаедаў. Улады загадзя сталі рыхтавацца да пратэстаў і развесілі гукаўзмацняльную апаратуру. 10-га сакавіка некалькі разоў на плошчы ўключалася гучная музыка, тая ж самая расейская поп-музыка, якую круцяць і па расейскіх тэлеканалах, якія дагэтуль транслююцца ў Беларусі. У прыватнасці, для аршанцаў прагучалі старыя хіты Стаса Міхайлава, Філіпа Кіркорава і іншых дзеячаў расейскай поп-сцэны. Ці засталіся аршанцы задаволеныя такой гучнай і навязлівай музыкай у самым цэнтры горада — невядома.
Аднак для многіх відавочна, што музыка ўключалася не дзеля азнаямлення аршанцаў з нейкімі песнямі, а дзеля таго, каб праверыць, наколькі гукаўзмацняльная сістэма на плошчы здолее "пераглушыць" тых, хто 12-га сакавіка выйдзе на плошчу і будзе там выступаць за свае канстытуцыйныя правы. Гук сістэмы і сапраўды някепскі, але адзін з мінакоў адрэагаваў на пытанне карэспандэнта orsha.eu з усмешкай: "Ну, значыць, і я гучней буду крычаць "Жыве Беларусь" і "Не дэкрэту № 3".
Падобныя меры мясцовыя ўлады прадпрымалі і ў Пінску з Маладзечнам. На Палессі райвыканкам напярэдадні пратэстаў абгарадзілі двума шэрагамі плота, што, паводле журналістаў, яскрава намякае на стаўленне ўлады да людзей, а ў Маладзечне за дзень да пратэстаў на плошчы нечакана... пачаўся рамонт. Тым не менш, маладзечанцам гэта не перашкодзіла, і акцыя ў горадзе сабрала каля 1 000 чалавек. Пасля ёй былі затрыманы палітыкі Анатоль Лябедзька, Віталь Рымашэўскі, Юрась Губарэвіч, Алесь Абрамовіч і Вольга Кавалькова, а таксама журналіст БелаПАН Сяргей Каралевіч. Бачна, што ўлады рукамі сілавікоў спрабуюць зменшыць хвалю пратэстаў, аднак незадаволеных становіцца яшчэ больш.
Пратэст у Оршы, які пройдзе якраз за маладзечанскім, на думку юрыстаў, якія знаходзяцца ў Маладзечанскім РАУС, будзе знакавым. Ён пакажа альбо страх народа перад рэпрэсіямі ўладаў, альбо прадэманструе стомленасць людзей маўчаць і цярпець.
