Паведамленне пра самую масавую акцыю пратэсту за апошнія 26 гадоў у Оршы ў міліцыі атрымалася вельмі сціслым. Па сутнасці, яно тычыцца толькі двух затрыманняў журналістаў (хаця затрымана журналістаў было значна больш) "с целью проверки законности осуществления своей профессиональной деятельности" Галіны Абакунчык і Кацярыны Андрэевай. Нагадаем, што абедзве яны атрымалі штрафы за работу на мітынгу ў памеры 25 і 30 базавых велічыняў адпаведна.

Прэс-служба ў выпадку з Абакунчык спасылаецца на тое, што жанчына не прад'явіла дакуманты, што міліцыянты і палічылі за непадпарадкаванне. Сама ж Галіна на судзе распавядала зусім іншую сітуацыю: журналісцкі дакумант вісеў у яе на шыі (гэта выразна бачна і на відэа з мітынгу), а міліцыянты сілком запхалі яе ў машыну не толькі не запытваючы яе дакумантаў, але і самі не прадставіліся.

У прынцыпе, прэс-служба прадказальна стала на бок супрацоўнікаў міліцыі. Праўда, усю гэтую афіцыйную пазіцыю міліцыі амаль ніхто не прачытаў: незалежныя журналісты, канешне, "грубую хлусню" (так Абакунчык назвала паказанні міліцыянтаў у судзе) ў дачыненні да сваіх калегаў перадрукоўваць не будуць, а дзяржаўным СМІ забаронена без указкі "зверху" гаварыць пра пратэсты.

Пра іншыя эпізоды акцыі міліцыя так і не выказалася.