Аршанскае прадстаўніцтва незалежнага прафсаюза работнікаў радыёэлектроннай прамысловасці (РЭП) звярнулася ў Аршанскі райвыканкам з афіцыйнай заяўкай на ўдзел у святочным мітынгу ў гонар Міжнароднага дня салідарнасці працоўных (1 Траўня). Сябры прафсаюза ў складзе каля 100 чалавек планавалі далучыцца да святкаванняў і паўдзельнічаць у мітынгу ў складзе агульнай калоны. Аднак улады ў афіцыйным адказе, падпісаным намеснікам старшыні выканкама Алегам Смірноўскім, адзначылі, што сёлета мітынг на свята 1 Траўня праводзіцца не будзе.

Прадстаўнік незалежнага прафсаюза РЭП Васіль Бераснеў лічыць, што такое рашэнне ў выканкаме прынялі нездарма. Улады папросту збаяліся, каб нехта са звычайных рабочых не ўзяў на мітынгу слова і не стаў крытыкаваць дзеянні ўлады, у тым ліку і масавыя затрыманні на "Маршы недармаедаў" 12-га сакавіка. Акрамя таго, у афіцыйным адказе выканкам звярнуў увагу на тое, што арганізацыя РЭП не зарэгістравана. Гэта не адпавядае рэчаіснасці, адзначаюць у прафсаюзе РЭП. Арганізацыя афіцыйна зарэгістравана ў Менску, а ў Оршы падавалася заяўка толькі пра пастаноўку на ўлік. Але ліст з адказам на тую просьбу з выканкама не дасылаюць амаль тры месяцы, хаця адказ павінен быў прыйсці 27-га лютага. Гэтым мясцовыя ўлады пратэрмінавалі час адказу па закону, прафсаюз РЭП звернецца з гэтай нагоды ў пракуратуру.

Пакуль жа можна канстатаваць адно: з-за актыўнасці аршанцаў, у тым ліку актыўнай дзейнасці прафсаюзу РЭП улады Оршы ўпершыню адмянілі мітынг на 1 Траўня, бо асцерагаюцца незапланаваных выступаў простых рабочых. Раней мітынгі на 1 Траўня традыцыйна адбываліся ў "рафінаванай" атмасферы пры ўдзеле работнікаў "ідэалогіі" і працякалі пры дзяжурных выступах афіцыйных асоб.