Губернатар Растоўскай вобласці Васіль Голубеў наведаў з візітам Беларусь. У Менску ў рамках яго візіту адбылася сустрэча прадстаўнікоў беларускай Оршы і расейскага Валгадонска. Яны падпісалі дамову пра пабрацімскія сувязі гарадоў, паведамляе твітэр Беларусь-регионыRU.

Валгадонск — горад у Растоўскай вобласці Расеі з насельніцтвам 170 тысяч чалавек. Энергетычны цэнтр поўдня Расеі, менавіта ў Валгадонску знаходзіцца "Атоммаш", прадпрыемства атамнага энергетычнага машынабудаўніцтва. Яно было найбуйнейшым у СССР, а цяпер такое ў Расеі. Заснаваны Валгадонск быў толькі ў 1950 годзе, амаль на 9 стагоддзяў пазней за Оршу. У Валгадонску збіраліся будаваць атамную электрастанцыю, але пасля катастрофы ў Чарнобыле будаўніцтва згарнулі, бо жыхары масава выступілі супраць. Гэта было ў 1992 годзе. Аднак у 2001 годзе Валгадонская АЭС была запушчана. У горадзе 6 вышэйшых навучальных устаноў, якія з'яўляюцца філіямі розных інстытутаў. У Валгадонску нарадзіліся дзве вядомыя на ўвесь свет спартоўкі - бягуха Юлія Гушчына, алімпійская чэмпіёнка Пекіна, а таксама чэмпіёнка свету і Еўропы ў плаванні брасам Юлія Яфімава.

У Оршы ўжо 24 гарады-пабрацімы. Раней пагадненні заключаліся з рознымі гарадамі розных краін. Адміністрацыя Лісоўскага ж зрабіла стаўку на расейскі вектар. Цяпер роўна палова гарадоў-пабрацімаў, а менавіта 12, з Расеі.