Мы ўжо прызвычаіліся да таго, што беларускія чыноўнікі вельмі немедыйныя людзі - яны даюць мала інтэрв'ю (уся ўвага СМІ накіроўваецца на Прэзідэнта, а ягоныя падначаленыя выглядаюць статыстамі ў гэтых перадачах), яны не прысутнічаюць у сацыяльных сетках і рэдка даюць інтэрв'ю незалежным рэдакцыям. Але новы старшыня Аршанскага выканкаму нават у гэтым плане абышоў сваіх калегаў. Ва ўсёй інтэрнэт-прасторы няма нават поўнай біяграфіі Леаніда Пянькоўскага. А раённая бешанковіцкая газета на сваім сайце пераважна паведамляла пра прыёмы свайго старшыні выканкаму і гарачыя лініі, а таксама некалькі артыкулаў пра тое, што яго ўзнагародзілі званнямі "Заслужаны работнік сельскай гаспадаркі РБ" і "Чалавек года Віцебшчыны". Пры гэтым, Пянькоўскаму было даручана выступіць з прамовай на 5-ым Усебеларускім народным сходзе, дзе той распавядаў пра поспехі Бешанковіцкага раёна. Ён кіраваў раёнам 9 гадоў і пры гэтым раённая газета на сваім сайце па стане на 14 мая так і не напісала нічога пра яго перавод у Оршу.
Затое незалежны сайт Бешанковічаў зрабіў ацэнку 9-гадовай рабоце Пянькоўскага на пасадзе старшыні іхняга выканкаму. Да плюсаў Пянькоўскага сайт beshankovichy.by адносіць рост вытворчасці ў галіне сельскай гаспадаркі, але да мінусаў тое, што пры развіцці існуючых прадпрыемстваў, у раёне не было пабудавана аніводнага новага сельскагаспадарчага прадпрыемства, а вясковыя школы зачыняліся і вёскі раёна актыўна выміралі. Пры тым жа росце вытворчасці (а іх лічбы сапраўды ўражваюць), заробкі ў раёне не раслі - сёння раён займае перадапошняе месца па краіне па ўзроўні заробкаў.
Да мінусаў адносяць і тое, што Пянькоўскі не цікавіўся спортам і ён мала фінансаваўся, што для Аршанскага раёна з вялікай спартовай інфраструктурай і поспехамі ў гэтай галіне можа стаць праблемай. Мала ўвагі пры ім надавалася і культуры. Так, помнікі культуры ў Бешанковіцкім раёне сёння ў кепскім стане, а некаторыя за час Пянькоўскага былі знішчаны. Сумніўна, што аршанцам можна будзе разлічваць на нешта іншае. І, нарэшце, пры Пянькоўскім ў раёне з'явіўся свой сацыяльны доўгабуд - басейн, які пачаў будавацца ў 2013 годзе і ўжо праз год будаўніцтва спынілася.
Нарадзіўся Леанід Пянькоўскі ў вёсцы Баўсевічы Круглянскага раёна (зноў Магілёўская вобласць), але меў дачыненне да Аршаншчыны - некаторы час ён кіраваў гаспадаркай у Забалацці. А да цяперашняга прызначэння, 9 год працаваў старшынём Бешанковіцкага выканкаму.
