І гэта ніякі не жарт, еўрапейскія тэндэнцыі пачынаюць пакрысе пранікаць і ў Беларусь. Вольга Цярэшка з Маладзечна будзе галоўнай суддзёй на футбольным матчы 1-й лігі чэмпіянату Беларусі паміж "Оршай" і "Слонімам". І хто сказаў, што жанчыны не разбіраюцца ў футболе? Няпраўда! Гісторыя Вольгі абвяргае стары стэрэатып пра "чыста мужчынскую гульню", у якой жанчыне нібыта не дадзена разабрацца.
Вольга Цярэшка доўга трэніравалася і хацела стаць знакамітай футбалісткай. Пасля роднага Маладзечна яна адправілася ў вучэльню ў Віцебску, дзе працягвала вучыцца футболу і актыўна ў яго гуляла. Затым яе выклікалі ў моладзевую зборную краіны, адкуль яна заслужыла выклік у нацыянальную каманду. На жаль, цяжкая траўма калена перашкодзіла Вользе, і яна не здолела працягнуць гульнявую кар'еру.
Замест гэтага адправілася на зборы суддзяў і з часам стала...рэферы ФІФА! Колькі яшчэ арбітраў беларускай Першай лігі, мужчынаў, маюць такую высокую катэгорыю?! Яна ўжо абслугоўвала ў якасці галоўнага арбітра матчы нацыянальных жаночых зборных і матчы першых раўндаў жаночай Лігі чэмпіёнаў. А для таго, каб абслугоўваць такія сустрэчы, неабходна не проста цудоўна разбірацца ў правілах гульні №1, але яшчэ і добра валодаць англійскай мовай. З гэтым у суддзі ўсё ў парадку.
Вольга ў адным з інтэрв'ю ўзгадвала, што прабягае за матч мужчынскіх камандаў па 10 км, гэта вымагае ад яе штодзённых заняткаў фізічнай падрыхтоўкай. Спадарыня Цярэшка адзначае, што спрабуе прадухіляць мат у размовах паміж футбалістамі і адзначае, што на яе матчах гульцы-мужчыны лаюцца матам значна радзей, чым тады, калі суддзя - мужчына.
27-гадовая Вольга Цярэшка - першая жанчына-суддзя ў беларускім футболе, якой даручылі працаваць на матчах Першай лігі. Верагодна, у будучым яна зможа працаваць і на сустрэчах Вышэйшай лігі. А пакуль жадаем спадарыні суддзі беспамылкова адпрацаваць на матчы "Орша" - "Слонім". А публіцы на Гарадскім стадыёне жадаем убачыць поспех роднай каманды!
