Летась бабруйчане ўпершыню за доўгія гады развіталіся з Вышэйшай лігай чэмпіянату Беларусі і ўпалі ў 1-ю. Аршанцы сустрэлі супернікаў у гатовасці адабраць пункты, але першы тайм прайшоў пад дыктоўку бабруйскай каманды. Яна значна часцей атакавала і змарнавала як мінімум адзін момант. У другім тайме падапечным Юрыя Канаплёва ўдалося адсунуць гульню ад сваёй брамы і нават займець моманты. Небяспечна над папярэчынай прабіў Уладзіслаў Знак, моцнаму ўдару Хадневіча са штрафнога крыху не хапіла дакладнасці. Мелі магчымасць вызначыцца і бабруйчане – ў адным з эпізодаў за аршанцаў згуляла крыжавіна брамы, а ў другім упэўнена згуляў брамнік Дзмітрый Харытонаў.
А ў канцы сустрэча разгарэўся скандал. Арбітр Ішчанка з Рэчыцы ўбачыў у гульні аршанца гульню рукой, хаця абаронца проста апынуўся на шляху мяча, а той ляціў з вялікай хуткасцю. Вельмі спрэчны пенальці, і Шаракоў прыносіць “Белшыне” вікторыю на 90-й хвіліне.
“Орша” прайграла чацвёрты матч запар і апусцілася на 10-е месца ў табліцы. Каманду Юрыя Канаплёва пачынаюць усё больш крытыкаваць, і ёсць за што: па-ранейшаму аршанцы знаходзяцца не ў самых лепшых фізічных кандыцыях, маюць праблемы ў атацы і дапускаюць неапраўдана шмат браку ў перадачах. З іншага боку, у мінулым сезоне камандзе Канаплёва і самому трэнеру за першую палову сезону даставалася не менш, аднак у другім коле аршанцы пабачылі іншую каманду, якая заняла рэкорднае для клуба 7-е месца ў Першай лізе.
