Камандны чэмпіянат Еўропы - унікальнае спаборніцтва. Ты можаш быць героем, выйграць першае месца ў сваёй лёгкаатлетычнай дысцыпліне. І нават усталяваць сусветны рэкорд. Але калі іншыя віды не прыносяць пунктаў, твая зборная можа пакінуць дывізіён "А". 11 краін — па адным прадстаўніку ў кожным відзе. Зборная Беларусі выступае ў наймацнейшае лізе кантынентальнай лёгкай атлетыкі. Але пасля двух дзён спаборніцтваў у Францыі каманда нашай краіны займае перадапошняе 10-е месца, ніжэй толькі Нідэрланды. Такім чынам, беларусы блізкія да вылету з вышэйшага дывізіёну.
Але выступ аршанкі Аліны Талай яшчэ не скончаны. Яна выступае, як і заўсёды, у бегу на 100 метраў з бар'ерамі. Прадстаўніцы кожнай з 11 краінаў былі падзеленыя на два паўфінальныя забегі. Свой забег Талай, як і прадказвалася, выйграла без вялікіх праблемаў, паказаўшы час 13,11 секунды. Канкурэнцыю Аліне спрабавала навязаць толькі полька Караліна Колечэк, якая прайграла беларусцы 0,06 секунды. Аліна з першага месца трапіла ў фінал.
Фінальны забег у жанчын на дыстанцыі 100 метраў з бар'ерамі адбудзецца ў нядзелю, 25-га чэрвеня і пачнецца ў 15:44 па беларускім часе. Талай пабяжыць па 6-й дарожцы. Сярод усіх удзельніц фіналу лепшыя паказчыкі за Талай у кар'еры мае толькі немка Памэла Дуткевіч. Лепшы паказчык Аліны 12,63, а ў Дуткевіч 12,61. Такі час нямецкая спрынтарка паказала якраз у гэтым сезоне. У Талай лепшы час у 2017-м значна горш — 12,90. Імаверна, толькі Дуткевіч і Талай пазмагаюцца за перамогу ў дысцыпліне і за права прынесці максімальную колькасць балаў сваёй краіне.
