Як паведамляе сайт tut.by, комплексны план першачарговых мераў па развіцці Аршанскага раёна быў падпісаны віцэ-прэм'ерам краіны Васілём Мацюшэўскім. Пры гэтым, самога тэксту дакуманта ў публічнай прасторы не заўважна - няма яго ні на сайце Аршанскага выканкаму, ні на сайце ўраду. Просім нашых чытачоў дапамагчы ў пошуках дакуманта і, у выпадку, калі вы яго знойдзіце, даслаць у рэдакцыю сайта для публікацыі.
Комплексны план ствараўся з моманту, калі Лукашэнка загадаў падняць Аршаншчыну з "руінаў і попелу", некалькі разоў розныя чыноўнікі гаварылі пра асобныя яго пункты, або пра канцэпцыю. Але да гэтае пары дакумант дапрацоўваўся.
План разлічаны да 2020 года. Першыя размовы пра "План" тычыліся Інструментальнага завода - на развіццё гэтага мерапрыемства дзяржава планавала выдзяліць вялікую суму грошай. Але "План" крыху скарэктаваў гэтыя планы. У асноўны дакуманты, па інфармацыі tut.by, запісана, што Інструментальны завод будзе развівацца за кошт "стратэгічных інвестараў". Таксама інвестараў плануецца прыцягнуць і да завода "ПАК". Ільнокамбінат будзе больш моцна інтэграваны з іншымі арганізацыямі швейнай галіны і гандлю. Мясакамбінат атрымае дапамогу ў выглядзе зніжэння ставак крэдытавання для будаўніцтва фермы на 900 кароў у Браздзетчына і рэканструкцыі шэрага аб'ектаў, сярод якіх новы цэх забою. Мадэрнізацыя таксама чакае малочны камбінат.
За кошт крэдытавання ў арганізацыі раёна закупяць 121 адзінку сельскагаспадарчай тэхнікі. Павінна быць павялічана колькасць будаўнічых работаў і зніжаны іх кошт - кошт павінен стаць не даражэйшы, чым у сярэднім па краіне.
Для паляпшэння экалогіі павінны быць палепшаны палігоны для адкідаў у вёсках Стар, Засеклі, Забалацце, Копысь, Пугляі, Ляўкі. А таксама палепшана сітуацыя з адкідамі у самой Оршы ды Арэхаўску.
У школах, дзіцячых садках, каледжах, установах культуры павінны прайсці капітальныя рамонты, акрамя таго дабудаваныя бальніца і дзіцячы садок па вуліцы Магілёўскай.
У Барані павінна з'явіцца спартова-гульнявая пляцоўка з трэнажорамі, а "Дом быта "Орша" (так у тэксце артыкула tut.by) будзе пераабсталяваны пад гатэль для спартоўцаў. Павінна палепшыцца і гандлёвае абслугоўванне насельніцтва.
