Аршанскі раён да 2020 года плануюць вывесці на ўзровень вышэй за сярэднеабласны. Пра гэта паведаміў сайт беларускага ўраду. Кіраўнік урада Андрэй Кабякоў нагадаў, што прэзідэнт Лукашэнка даручыў ліквідаваць недахопы ў працы па развіцці Аршанскага раёна. Акрамя таго, трэба дапрацаваць комплексны план па паляпшэнні становішча ў гэтым рэгіёне, вызначыўшы эканамічна абгрунтаваныя кропкі росту, якія прадугледжваюць паэтапны выхад раёна да 2020 года на ўзровень вышэй за сярэднеабласны.
На пасяджэнні разгледзелі два блокі пытанняў - аграпрамысловы комплекс і машынабудаўнічыя прадпрыемствы, падначаленыя Мінпраму і Дзяржкамваенпраму. Андрэй Кабякоў адзначыў, што ў бліжэйшы час пачнецца ўзгадненне праекта праграмы развіцця Аршанскага раёна да 2020 года і комплексу мер па яе выкананню.
