Не так даўно на нашым сайце прайшло апытанне "ці будзе карысць ад чарговай змены мэраў?". З самой пастаноўкі пытання вынікае, што справа тычылася менавіта бягучай сітуацыі з той чарадой зменаў старшыняў Аршанскага райвыканкаму, але сярод іншага мы заклалі ў варыянты адказу і такі: "Мэраў трэба выбіраць - тады і будзе карысць". Упершыню апытанне на сайце дало такія вынікі, каб пераважная большасць прагаласаваўшых з 389 чалавек з сямі варыянтаў абрала адзін і той жа - за выбранасць мэраў.

Гэтае ж апытанне мы размесцілі ў суполцы сайта ў сацыяльнай сеты "У кантакце". Тут папулярнасць варыянту за выбранасць мэраў набрало яшчэ большы працэнт галасоў - са 187 чалавек больш за 56%.

Насамрэч, у пачатку незалежнасці кіраўнікоў гарадоў і раёнаў, сапраўды, выбіралі. Гэта былі не зусім прамыя выбары (людзі не галасавалі за асобу прапануемую на гэтую пасаду), выбаршчыкі галасавалі выбіраючы дэпутатаў гар-рай саветаў, а ўжо дэпутаты са свайго складу выбіралі старшыню савета, які і быў галоўным чалавекам у горадзе. Але з прыходам на пасаду прэзідэнта Лукашэнкі, ён пачаў будаваць так званую "вертыкаль улады" - старшыні выканкаму сталі прызначацца і адказваць перад прэзідэнтам, а не перад тымі хто іх выбіраў. Добра гэта ці кепска, кожны можа меркаваць сам, запрашаем выказваць свае думкі на гэтую тэму ў каментарах пад гэтым артыкулам.

Але цікава, што амаль праз 20 гадоў існавання такой вертыкалі людзі зноў пачалі выказвацца за магчымасць выбіраць сваіх чыноўнікаў.