Лідэр Аб'яднанай грамадзянскай партыі Анатоль Лябедзька на гэтым тыдні наведаў Оршу з візітам. Ён прыняў удзел у велапрабегу супраць магчымай пабудовы дарогі на месцах масавых бальшавіцкіх расстрэлаў пад Воршай, а таксама збіраў подпісы супраць дзедаўшчыны ў беларускай арміі. На працягу усяго візіту за Лябедзькам і актывістамі яго партыі нястомна сачылі так званыя "ціхары", пераапранутыя супрацоўнікі міліцыі і КДБ. Акрамя таго, па дарозе ў Оршу аўтамабіль Лябедзькі спыняла ДАІ на падставе выяўлення нецвярозых кіроўцаў. У выніку ім удалося на 40 хвілін затрымаць велапрабег. Сам палітык пракаментаваў для сайту сваёй партыі, што адбывалася ў Оршы. Цікаванне за сабой і калегамі Лябедзька назваў паўсюдным, а "ціхароў", якія сачылі за імі, назваў лайдакамі, якія паляць бюджэтныя грошы.

Я налічыў як мінімум чатыры аўто, якія, змяняючы адзін аднаго, нас паўсюдна суправаджалі. Мы націскалі на педалі ровара, а яны палілі бюджэтнае паліва. Ужо непасрэдна ў лесе, на месцы меркаваных масавых пахаванняў ахвяр сталінскіх рэпрэсій, куча гультаёў, па-іншаму назваць іх нельга, здымалі, назіралі за тым, што адбываецца з-за дрэў і кустоў. Шчыра кажучы, мне складана растлумачыць тое, што адбываецца, які ненармальны сверб пад пагонамі. Магчыма, гэта такі рэжым для рэгіёну, які Лукашэнка мае намер зрабіць ўзорна-паказальным.