У 9-м туры чэмпіянату Беларусі па міні-футболе ў вышэйшай лізе аршанскі "Вітэн" прымаў на сваім полі ў спартовым комплексе "Алімпіец" "Дынама-БНТУ" з Менску. Сталічная каманда замыкае турнірную табліцу. Аршанцы на ўласнай пляцоўцы не мелі вялікіх праблем. Ужо на 15-й хвіліне "чырвона-чорныя" вялі 4:0 пасля ўдараў Кардобы, Еўдакімава і двух выніковых стрэлаў Чарніенкі. На апошняй хвіліне першай паловы сустрэчы дынамаўцы адыгралі адзін мяч.
У другім тайме гульня прадоўжылася пад дыктат аршанцаў. Двойчы Гусакоў, а таксама Мароз і Дзядзічкін забівалі галы ў браму Зрубовіча, на што госці адказалі двума мячамі. Пераканаўчая вікторыя з лікам 8:3, і аршанскі "Вітэн" кладзе ў скарбонку яшчэ 3 пункты.
Пакуль аршанцы працягваюць займаць 6-е месца ў турнірнай табліцы чэмпіянату.
