Чарговае паседжанне раённай выбарчай камісіі тычылася ў першую чаргу пытання рэгістрацыі кандыдатаў у дэпутаты, якія падалі заяўкі на ўдзел у выбарах. Па дакладных падліках падалі дакуманты на рэгістрацыю агулам 86 кандыдатаў на 37 месцаў у Савеце дэпутатаў. Камісія не заўважыла ні ў каго сур'ёзных парушэнняў пры зборы подпісаў і адмовіла ў рэгістрацыі толькі двум чалавекам. Прычым, абодва кандыдаты якім было адмоўлена ў рэгістрацыі, прадстаўнікі партыяў, якія пазіцыянуюць сябе як ліберальныя.

Так, было адмоўлена ў рэстрацыі 18 гадоваму сябру Ліберальна-дэмакратычнай партыі, які вылучаўся па Межаўскай акрузе (тут жа вылучаецца сёняшні старшыня Савета дэпутатаў Станіслаў Кошкін). Малады кандыдат студэнт Полацкага ўніверсітэта і пражывае па месцы вучобы. Адпаведна, часовая прапіска ў яго полацкая і на гэтай падставе яму было адмоўлена - кандыдат павінен пражываць або працаваць на акрузе.

У другім выпадку было адмоўлена ў рэгістрацыі сябру Аб'яднанай грамадзянскай партыі Сяргею Пракапчуку. Яму адмоўлена на падставе інфармацыі падатковай, якая паведаміла, што ў Пракапчука быў незарэгістраваны даход ад прадпрымальніцкай дзейнасці. Як патлумачыў сам Сяргей, да таго як ён падаў дакуманты на рэгістрацыю, ён удакладняў у падатковай ці ўсё ў яго ў парадку з выплатамі і - па яго словах - тады ні пра якія даходы не гаварылася, але да камісіі пайшла іншая інфармацыя, якая цяпер перашкодзіла балатавацца кандыдату.

Цяпер у выбарах прымуць удзел 84 кандыдаты.