Стартавала фінальная серыя Віцебскай абласной непрафесійнай баскетбольнай лігі. Прад фіналам, у якім выступаюць аршанскі "Сяргееў В" і віцебскі "БЛ Груп" самым страшным для аршанцаў статыстычным фактам была бяспройгрышная серыя суперніка, якая доўжылася з кастрычніка. Цяпер можна смела і з радасцю за аршанцаў заявіць: доўжылася, у прошлым часе. Менавіта "Сяргееў В", менавіта ў фінале здолеў нанесці "БЛ Груп" паразу, пра якія візаві даўно забылі.

Але ў матчы ўсё было зусім не так проста. Пасля першай чвэрці здавалася, што бела-зялёныя зноўку не пакінуць супернікам шанцаў, яны вялі 28:18. Але другая чвэрць стала вельмі паспяховай ужо для аршанцаў. І ў Лужасне да перапынку гарэлі лічбы 41:40, усё ж яшчэ на карысць "БЛ Груп".

Пачатак другой паловы паядынку стаў практычна кашмарам для "Сяргеева В". Амаль 6 хвілін трэцяй чвэрці ніводнага набранага балу, а віцебляне тым часам рухаліся наперад і мелі +11. Аднак заключная чвэрць паядынку паказала неўтаймаванае жаданне калектыва з Оршы. Перамога 28:9! Такая ўпэўненая чвэрць дазволіла выйграць увесь матч 77:69 і павесці ў серыі 1-0.

Самым выніковым у камандзе Віктара Сяргеева стаў Яўген Дамброўскі. Лідэр аршанцаў набраў 26 балаў, зрабіў 15 падбораў, выканаў 1 перахоп, 1 блок-шот і дабл-дабл. Акрамя таго, зарабіў на сабе 5 фалоў. Наступны матч серыі адбудзецца на выходных у Оршы, пра яго наш сайт напіша дадаткова.