У Оршы, Баранавічах, Пінску і Бабруйску ствараюцца новыя хакейныя клубы. Іх стварэнне было абвешчана даўно, у тым ліку і ў нашым горадзе. Акрамя таго, у Оршы актыўна прыступілі да фармавання новай каманды — "Лакаматыў", стала вядома, што яе аснову складуць хакеісты менскага "Юніёра", а галоўным трэнерам стане экс-гулец нацыянальнай зборнай Андрэй Расолька, які ўжо мае і трэнерскі досвед. Затым у Оршу прыехала зорка беларускага хакею Міхаіл Грабоўскі, які правёў майстар-клас для юных аршанскіх хакеістаў. Аднак цяпер пры стварэнні новых каманд ў чатырох беларускіх гарадах узніклі цяжкасці. Перадусім фінансавыя.
Намеснік старшыні Федэрацыі хакея Беларусі Дзмітрый Баскаў паведаміў:
- Мы сутыкнуліся з шэрагам праблем, да сённяшняга дня яны існуюць. Але Жарко нас запэўніў, што ўсе пытанні на дзяржаўным узроўні будуць закрытыя. Асноўнае пытанне - гэта фінансы. Ні для каго не сакрэт, што ўвесь хакей у нас на дзяржаўным фінансаванні. Калі ў новых клубаў будзе фінансаванне, то ніякіх праблем з іх дзейнасцю не будзе, — сказаў Баскаў у праграме "Вынікі тыдня" на канале "Беларусь 5".
Віцэ-прэм'ер Васіль Жарко тыдзень таму заявіў, што ўся Беларусь жыве хакеем і той абавязкова падымецца да 2021 года, калі Беларусь разам з Латвіяй будуць прымаць чэмпіянат свету. Цяпер намеснік прэм'ер-міністра абяцае закрыць усе існуючыя пытанні па стварэнні новых каманд. Нагадаем, што раней было аб'яўлена, што спонсарам хакейнага клуба "Лакаматыў" з Оршы будзе Беларуская чыгунка.
