Для трэнераў і спартоўцаў хакейнага клуба «Лакаматыў» (Орша) тарыфная стаўка па зарплаце павышана на 500%. Гэта значыць, што аклады для іх павышаны адмысловай пастановай Урада ў пяць разоў. Але з умовай. У чэмпіянаце «Лакаматыў» павінен заняць месца не ніжэй за 8-е. Галоўны трэнер каманды – Андрэй Расолька, які дагэтуль трэніраваў менскі «Юніёр». Зрэшты, хакеісты якраз гэтага клуба на першую пару склалі аснову аршанскай хакейнай дружыны.
«Лакаматыў» ужо правёў два матчы ў Кубку Салея (Кубку Беларусі). Каманда перамагла юніёрскую зборную Беларусі 5:2 і саступіла 2:4 «Берасцю».
Савет міністраў, каб апраўдаць верагоднае павышэнне заробку, унёс дапаўненні ў пастанову Урада «Аб некаторых пытаннях рэгулявання аплаты працы работнікаў клубаў па гульнявых відах спорту, якія атрымліваюць падтрымку». Там гаворыцца пра залежнасць зарплаты трэнера ад вынікаў мінулага сезону.
