Падобна на тое, што мы ўсё яшчэ сутыкаемся з наступствамі мінулага года - марша "не дармаедаў". Нагадаем, што праз некаторы час пасля таго як у Оршы прайшла адна з найбольш масавых акцыяў пратэсту, Лукашэнка абвесціў "пад'ём Оршы з руінаў і попелу", а Мікалая Лісоўскага, які ўзначальваў выканкам знялі з пасады (праўда, ён даволі доўгі час прабыў на сваёй пасадзе). Яму на замену падбіраюць Леаніда Пянькоўскага, які тут жа патрапляе ў скандал з уласным знікненнем і меньш чым праз тры месяцы сыходзіць з пасады. І трэцім чыноўнікам, які змог пакіраваць горадам у 2017 годзе - Аляксандар Пазняк. Адносна сваіх папярэднікаў ён глядзеўся добра. Ды і дзеянні яго былі даволі нетыповымі для сённяшніх чыноўнікаў - падначаленым асабліва не хаміў, лёгка ішоў на дыялог і ветліва размаўляў з людзьмі. За яго час у выканкаме прайшлі некаторыя змены, у прыватнасці, была звольнена Ганна Святлова - начальніца аддзела культуры, якая запомнілася вялікай колькасцю забаронаў мерапрыемстваў. У апошні час свайго кіравання ён нават пагадзіўся за кошт выканкаму аднавіць шыльду на помніку на Кабыляцкай гары.
Затое поспехаў у пад'ёме "з руінаў і попелу" было не надта заўважана. Напрыклад, раней за гэтыя поспехі выдаваліся інвестыцыі ў Ільнокамбінат, якія былі ўкладзены ў прадпрыемства задоўга да абвяшчэння "пад'ёму". З іншага боку, а ці віна Пазняка ў гэтым правале - праграма развіцця Аршаншчыны пісалася і зацвярджалася амаль увесь 2017 год. Фінансаванне на праграму скрачалася. У прыватнасці, тое, што тычыцца Інструментальнага завода, якому спачатку абяццалі больш за 60 мільёнаў на развіццё, а ў выніку скарацілі да 40 мільёнаў, і так і не зразумела, ці далі хоць гэта.
Тым не меньш, кароткі, але даволі цікавы час кіравання Пазняка скончыўся. Яму на замену прыходзіць былы вайсковец Ігар Ісачэнка. Чаго чакаць ад новага мэра пакуль не зразумела. Затое мы ўжо можам ацаніць работу папярэдняга мэра - Аляксандра Пазняка. Прапануем вам таксама ацаніць яго работу ў нашым апытанні, якое знаходзіцца на галоўнай старонцы сайта.
