Горад прымаў дэлегацыю з Ціндао — аднаго з найбуйнейшых прамысловых гарадоў Кітайскай Народнай Рэспублікі — ўжо другі раз. У траўні паміж рэгіёнамі быў падпісаны пратакол аб намерах па ўсталяванню сяброўскіх сувязяў, цяпер — замацавана подпісамі і пагадненне. Беларускі і кітайскі бакі будуць развіваць супрацоўніцтва, перш за ўсё, у сферах эканомікі і гандлю, а таксама навукі, адукацыі, культуры, спорту і турызму.

— Са студзеня па чэрвень бягучага года тавараабарот паміж Аршанскім раёнам і Кітайскай Народнай Рэспублікай склаў 3 мільёны даляраў, — адзначыў у ходзе афіцыйнай сустрэчы старшыня Аршанскага райвыканкама Ігар Ісачэнка, словы якога прыводзіць газета "Віцьбічы". — Пакуль адзіным прадпрыемствам у нашым рэгіёне, якое пастаўляе тавары ў Паднябесную, з'яўляецца Аршанскі льнокамбінат. Але мы спадзяемся, што падпісанне пагаднення паслужыць трывалай асновай для доўгатэрміновага супрацоўніцтва.

Падчас візіту кітайскія госці азнаёміліся з прадукцыяй аршанскіх вытворцаў, якую, па словах мэра горада Ціндао Мэн Фаньлі, яны былі б вельмі рады бачыць у сябе.

Таксама дэлегацыя абмеркавала перспектывы супрацоўніцтва ў будаўніцтве мультымадальнага прамыслова-лагістычнага комплексу «Брэміна-Орша» з прадстаўнікамі кампаніі ТАА «Брэміна груп» і пабывала ў краме «Дом лёну» льнокамбіната.