У папярэднім матчы на сваім полі аршанцы прымалі канкурэнта ў барацьбе за медалі. Хоць пра гэтую барацьбу яшчэ зарана казаць, аднак ужо вымалёўваюцца фаварыты, да таго ж "Вітэн" і ВРЗ традыцыйна сярод іх.
Матч з ВРЗ скончыўся ўнічыю 3:3. Прычым драматызм матчу аказаўся велізарным. "Вітэн" адкрыў лік, а затым, пры лічбах 3:2 у сваю карысць неаднаразова мог павялічыць адрыў, аднак не скарыстаўся момантамі. І за 2 секунды (!) да канца паядынку ВРЗ зраўняў лік на табло, так "Вітэн" згубіў пункты.
Матч са "Шчучынам" гэта паядынак фаварыта з аўтсайдэрам. Шчучынская каманда даволі сціплая, і перад матчам з "Вітэнам" не мае ў табліцы ніводнага балу. Усе чатыры стартавыя паядынкі ў чэмпіянаце "Шчучын" прайграў з агульнай розніцай галоў 6-26. У аршанцаў 11 пунктаў і 3-я пазіцыя з адставаннем у 1 бал ад "Лідсельмаша", які ачольвае табліцу.
Матч "Шчучын" — "Вітэн" пройдзе 21-га кастрычніка ў Шчучыне і пачнецца а 13:00.
