Самым папулярным артыкулам на Orsha.eu за ліпень 2018 года стаў матэрыял пра гібель вайскоўца з Оршы. Ён служыў у часці пад Менскам ва Ўруччы, ён быў салдатам не тэрміновай службы, а кантрактнікам. Яму было толькі 29 гадоў. Таксама ў гэтым месяцы ў бальніцы ім.Сямашкі былі зафіксаваныя хворыя на адзёр.
Таксама ў гэтым месяцы пры рамонце знайшлі трацілавыя шашкі. Чыгуначны мост праз раку Адроў, які знаходзіцца на выездзе з Оршы ў бок Барані і Шклова — адзін з найстарэйшых мастоў рэгіёна. Шашкі, на шчасце, праляжалі ў спакоі каля 80 гадоў, а затым іх абясшкодзілі спецыялісты.
У гэтым месяцы Аршанскі райвыканкам паабяцаў усталяваць дошку ў памяць аб ахвярах сталінскіх рэпрэсій. Таксама Аляксандр Пазняк стаў першым і пакуль адзіным кіраўніком выканкама, які наведаў трагічна вядомыя Кабылякі, дзе бальшавікі знішчалі людзей. У гэтым месяцы было аб'яўлена, што з 1 жніўня праз беларуска-расейскую мяжу перастануць прапускаць іншаземцаў. Прычына такога рашэння — расейскі закон “Аб дзяржаўнай мяжы Расейскай Федэрацыі”. Як часта гэта бывае, Расея прыняла рашэнне сама па сабе, без адмысловых кансультацый з беларускім бокам. Беларусь ніяк не пракаментавала падзеі, хаця штодня праз расейскую мяжу ў нашу краіну трапляе кантрабанда. 9-га ліпеня на паркоўцы каля чыгуначнага вакзалу загарэўся легкавы аўтамабіль. Полымя было велізарным, але яго хутка ўдалося патушыць.
Таксама ў ліпені з'явілася небяспека зносу дома, у якім з 1956 па 1958 гады жыў беларускі класік Уладзімір Караткевіч. З пазіцый сённяшняга дня мы ўжо ведаем, што дом выкупілі. Але тады толькі вырашаўся яго лёс. І наш сайт быў першым, які даведаўся пра гэта і падняў трывогу. Спачатку нашы карэспандэнты падрыхтавалі матэрыял да 34-годдзя смерці вялікага пісьменніка, а ўжо неўзабаве мы даведаліся, што аршанскія ўлады могуць пусціць дом "пад бульдозер". У той жа час з ініцыятывай выкупу дома выступіла і моладзевая арганізацыя "Звяз".
У ліпені нас чакаў і спартовы поспех. Юнацкая каманда «Оршы» стала чэмпіёнам Першай футбольнай лігі Беларусі.
