Кажуць, "алімпійка" ужо не тая, што раней. Траса М1 (Берасце - Менск - мяжа Расеі) адпужвае ўчасткамі з вялікай колькасцю ям і выбоін практычна па ўсёй шырыні праезнай часткі. Кіроўцы здзіўляюцца, марна шукаюць рамонтныя брыгады, якія рвуцца выпраўляць сітуацыю. Траса М1 з'яўляецца часткай еўрапейскага маршруту Е30, што ідзе праз значную частку кантынента. Аўтадарога, якая праходзіць па тэрыторыі Беларусі, традыцыйна асацыюецца з Алімпіядай-80, адсюль назва - "алімпійка". Але з гадамі траса губляе алімпійскія кандыцыі. І ў канцы зімы гэта асабліва прыкметна.
- Напэўна, ні для каго не сакрэт, што стан знакамітай «алімпійкі» даўно не такі, якім ён быў да ўвядзення транспартнага падатку. Яшчэ летам мінулага года стан М1 выклікала непакой і расчараванне, па меншай меры ўчастак ад Оршы да Менску. Пастаянныя «грабеньчыкі», каляіна, выбоіны і стандартны набор латак на дарозе ўжо тады не давалі спакойна даехаць з пункта А ў пункт Б, - распавёў карэспандэнту Onliner чытач Павел.
Прычым чытач яшчэ толькі пераходзіць да самых сумных навінаў.
- Тое, што стала з дарогай цяпер, проста жах. Такія ўчасткі, як на фота, сустракаюцца вельмі часта. Іх нельга аб'ехаць або хоць неяк праскочыць. А дазволеная хуткасць - 120 км/г, - канстатуе кіроўца.
На ўчастку трасы М1 ад Оршы да Менска (каля 250 км) Павел налічыў парадку дзесяці участкаў з кепскай якасцю дарожнага пакрыцця.
- Участак, які я сфатаграфаваў, напрыклад, размешчаны паблізу прыдарожнага кафэ «Страла» на 444-м км аўтадарогі. Але нават у іншых месцах, дзе дарога, здаецца, знаходзіцца ў больш прыстойным стане, сустракаюцца яміны глыбінёй 5-7 см, не кажучы ўжо аб усіх астатніх «любатах» накшталт расколін і выбоін. Калі раней абураліся тым, што выконваецца няякасны ямачны рамонт, то зараз і пра яго застаецца толькі марыць. Адзіная рамонтная брыгада на працягу ўсяго шляху была заўважаная мной недалёка ад Барысава. Гэтая брыгада складалася з трактара, які выглядаў яшчэ страшней, чым уся траса, і быў абвязаны лінолеўмам, а таксама двух працоўных, якія ў «калідорах» паміж праязджаючымі машынамі перамяшчаліся па дзвюх палосах і засыпалі ямы на дарозе нейкай сумессю, распавёў мужчына.
Гэта далёка не першая скарга на якасць дарожнага пакрыцця на трасе М1. Раней з крытыкай выступала чытачка Таццяна: "На працягу двух-трох кіламетраў па правым шэрагу суцэльныя ямы, як пасля бамбёжкі, - казала дзяўчына. - Траса не выглядае як платная дарога". Акрамя таго, нашы чытачы занепакоеныя тым, што на трасе часта адбываюцца сур'ёзныя аварыі. Да прыкладу, кіроўцы даўно чакаюць, калі пабудуюць развязку каля павароту да пасёлка Коласава, дзе ў выніку ДТЗ ўжо гінулі пешаходы. Планы па стварэнні такой развязкі агучваліся, аднак працы пакуль так і не пачаліся.
