Камітэт дзяржаўнай бяспекі Беларусі праводзіць праверку распаўсюджанай Службай бяспекі Украіны інфармацыі аб удзеле беларускіх грамадзян у баявых дзеяннях на тэрыторыі замежных дзяржаў. Пра гэта паведаміў БелаПАН афіцыйны прадстаўнік КДБ Андрэй Яраш. Праверка праводзіцца ў адпаведнасці з законам „Аб аператыўна-вышуковай дзейнасці”. Звесткі аб ходзе праверкі не могуць быць апублікаваныя ў адпаведнасці з заканадаўствам аб дзяржаўных сакрэтах. „Мы праводзім неабходныя аператыўна-вышуковыя мерапрыемствы. Пакуль гэта ўся інфармацыя”, — сказаў Яраш.
Раней Служба бяспекі Украіны апрылюдніла дадзеныя аб беларусах, якія ваююць у складзе так званай прыватнай ваеннай кампаніі Вагнера, якую звязваюць з блізкім Пуціну бізнесоўцам Яўгенам Прыгожыным (яго называюць „кухар Пуціна”). ПВК атрымала сваю назву ад пазыўнога, які выбраў яе кіраўнік падпалкоўнік запасу Дзмітрый Уткін. Паводле звестак украінскіх спецслужбаў, найміты прымалі ўдзел у баявых дзеяннях у Сірыі, Судане і іншых краінах. У ліпені мінулага года Кіеў паведаміў, што ў складзе ПВК Вагнера ў Сірыі ваююць 11 беларусаў. Шэсць з іх прымалі ўдзел у наступленні ў правінцыі Дэйр-Эз-Зор, падчас якога ПВК панесла вялікія страты: Руслан Бабінін, Канстанцін Гірс, Эдвард Давыдаў, Сяргей Сазанаў, Аляксандр Ступніцкі і Вадзім Юшкевіч. Потым высветліліся імёны іншых: Вадзім Аляксандравіч Васілеўскі, Вадзім Кліменцьевіч Васілеўскі, Андрэй Бакуновіч, Сяргей Кузняцоў і Уладзімір Курыненка.
Вядома, што пасля ўдзелу ў кампаніях ва Украіне і Сірыі Ступніцкі прыязджаў і некаторы час жыў у Оршы з жонкай і малым дзіцём.
У тэму:Не ў турме, але баяцца (+ відэа)
