Орша, Спорт

Толькі за бронзу

03.06.2019 11:35

2905 праглядаў, 0 каментароў

Аршанскі «Вітэн» прайграў серыю «Сталіцы» і пазмагаецца толькі за бронзавыя медалі.

Паўфінальная серыя чэмпіянату Беларусі па міні-футболе скончылася няўдала для аршанскага «Вітэна». Здабыўшы па перамозе, каманды ў трэцім матчы вызначалі, каму ісці па золата, а каму толькі па бронзу. Гульня ў оршы, на жаль, была праведзеная «Сталіцай» лепей і больш вынікова. На 13-й хвіліне Бэту, а на 15-й Гарбенка забяспечылі зялёна-белым гандыкап, які так і не быў адыграны аршанцамі. Аршанцы знялі брамніка і за пяць хвілін да канца сустрэчы намаганнямі Клачко скарацілі адставанне. Але ўсё вырашыў наступны эпізод. Ужо праз 7 секунд пасля прапушчанага мяча Гарбенка забіў мяч за «Сталіцу». 1:3, і надзеі становіцца меней.

Аршанцы зноў прыбягаюць да крайняй меры, здымаюць брамніка, але памыляюцца ў перадачах і прапускаюць два мячы ў пустую браму. Спачатку Раговік, затым Грыцына дабіваюцца поспеху ў «Сталіцы». Мяч Казла з перадачы Чарніенкі ўжо нічога не вырашае. «Вітэн» саступае 2:5 і прайграе серыю 1-2. Чырвона-чорных чакае серыя толькі за бронзавыя медалі. Такім чынам, аршанцы сёлета засталіся без тытулаў.