Скончыўся этап збору подпісаў і можна было б падвесці вынікі электаральнай падтрымкі прэтэндэнтаў на выбарах, але ў Оршы вынікі збору подпісаў атрымаліся алагічнымі - найбольш папулярныя кандыдаты набралі найменьш подпісаў.
Найбольш подпісаў здаў у выбарчую камісію разгубіўшы сваю папулярнасць дзеючы Прэзідэнт. Агулам яго ініцыятыўная група падала ў Аршанскую раённую камісію 34.914 подпісаў, што ў прынцыпе не дзіўна, улічваючы, што яго група і раней заяўляла пра высокія лічбы подпісаў, хаця ні на пікетах, ні ў інтэрнэт-апытаннях (пакуль іх можна было праводзіць) лічбы былі адваротныя. На другім месцы па колькасці здадзеных подпісаў у Оршы - нечакана - зусім не папулярны Бабарыка, а малавядомы малады палітык Сяргей Чэрачэнь - за яго ў камісію пададзена 6.743 подпісы. На трэцяй пазіцыі таксама не надта папулярная Ганна Канапацкая - 4.263 подпісы. З чым звязана такая колькасць подпісаў за гэтых прэтэндэнтаў патлумачыць складана, магчыма яны змаглі найлепш матываваць сваіх зборшчыкаў, а ва ўмовах калі людзі гатовыя падпісвацца за "любога акрамя яго", то проста трэба было дайсці да большай колькасці выбаршчыкаў.
Такім чынам, папулярны Бабарыка па колькасці здадзеных подпісаў аказаўся ў Оршы толькі на чацьвертым месцы з 2.701 подпісаў. За ім - прадказальна - яшчэ адзін лідар падпісной кампаніі - Святлана Ціханоўская з 1.783 подпісамі. Шостае месца заняў Андрэй Дзмітрыеў з 1.053 подпісаў і ў канцы здаўшых Цэпкала з 458 подпісамі. Астатнія прэтэндэнты ў камісію свае подпісы не здавалі. Цяпер у выбарчай камісіі ёсць амаль тыдзень на праверку подпісаў, пасля чаго прэтэндэнты будуць зарэгістраваныя і пачнецца агітацыйная кампанія.
