Пад час выбараў дзейнічаюць больш свабодныя законы аб масавых мерапрыемствах. Кандыдаты ў дэпутаты, або іх давераныя асобы толькі паведамляюць уладам пра намер правесці мітынг ці пікет, а не просяць дазволу.

Зараз агітацыйныя пікеты і мітынгі ў падтрымку Святланы Ціханоўскай ідуць па ўсёй краіне і пакуль за час агітацыйнай кампаніі аніводны з іх не быў забаронены ўладамі, але аршанскія выканкамаўцы вырашылі стаць першымі. Сёняшні - 2 жніўня - мітынг, які мусіў прайсці днём у парку герояў быў абвешчаны несанкцыянаваным і ў выніку не адбыўся.

Справа ў тым, што заяўку на гэты пікет падавала Вольга Кавалькова, якая зараз разам з Ціханоўскай аб'язжае Брэсцкую вобласць. Аршанскія ж чыноўнікі палічылі, што яна павінна сама прысутнічаць на мерапрыемстве, а без яе прысутнасці мітынг становіцца несанкцыянаваным. Але гэта спрэчная трактоўка закону, бо ён не прапісвае абавязковую прысутнасць заяўніка. Але абавязвае заяўніка забяспечыць парадак на мерапрыемстве. І ў гэтым спрэчнасць сітуацыі: ці можа чалавек без уласнай прысутнасці забяспечыць арганізацыйныя пытанні. У прынцыпе аршанскія давераныя асобы Ціханоўскай таксама прыходзілі ў выканкам і прапаноўвалі падаць заяўку ад свайго імя, тады чыноўнікі сказалі, што гэтага не патрабуецца, але сёння перад мітынгам у парк герояў прыйшла цэлая дэлегацыя выканкамаўцаў і абвесціла мітынг не санкцыянаваным.