У Беларусі працягваецца адміністрацыйны і крымінальны пераслед людзей, якія выступаюць супраць Аляксандра Лукашэнкі. Сотні тысяч людзей лічаць Лукашэнку не прэзідэнтам, а ўзурпатарам і заклікаюць таго сысці. Міліцыя не згодная з такімі патрабаваннямі людзей, працягвае служыць Лукашэнку і затрымлівае дэманстрантаў, нярэдка збіваючы іх. У судах людзі атрымліваюць штрафы або суткі зняволення. Пад "раздачу" трапляюць і людзі, якія проста апынуліся ў гэты час на вуліцы і ні ў чым не ўдзельнічалі, пра што яны кажуць журналістам. 19-га верасня ў Менску была затрыманая Наталля Хершэ, неўзабаве яна атрымала 15 сутак арышту. Наталля мае дваіх дзяцей, яна нарадзілася і вырасла ў Оршы, а цяпер стала пражывае ў Швейцарыі, у горадзе Санкт-Гален і з'яўляецца грамадзянкай Швейцарскай Канфедэрацыі.
Ужо ў ізалятары, куды Наталлю змясцілі пад арышт, Хершэ паведамілі, што на яе заведзена крымінальная справа па арт. 363 Крымінальнага кодэксу РБ за "Супраціў супрацоўніку органаў унутраных спраў з прымяненнем гвалту". Такую інфармацыю swissinfo.ch пацвердзіў П'ер-Ален Эльчынгер з Міністэрства замежных спраў Швейцарыі, акрамя таго Наталля Хершэ знаходзіцца ў спісах праваабарончага цэнтру "Вясна". Швейцарскае пасольства спрабуе звязацца са сваёй грамадзянкай, аднак пакуль не вядома, ці ўдалося гэта зрабіць. Хершэ прыехала на гістарычную радзіму ў Беларусь 11-га верасня, а ўжо праз восем дзён была арыштаваная нібыта за "ўдзел у несанкцыянаваным масавым мерапрыемстве". Цяпер пачаўся і крымінальны пераслед.
Нагадаем, што Швейцарыя не прызнала Лукашэнку прэзідэнтам Беларусі, як і шэраг іншых еўрапейскіх краін.
