Экстрымальныя маразы пабудзілі ўлады прадаставіць некалькі месцаў для выратавання.
Аршанскі раённы выканаўчы камітэт інфармуе, што ў сувязі з паніжэннем тэмпературы паветра, з 16 па 20 студзеня адкрыты «пункты абагрэвання» па наступных адрасах у Оршы:
вул. Астроўскага, 18 а (будынак Аршанскай раённай арганізацыі Беларускага Таварыства Чырвонага Крыжа),
вул. Шчацінкаўская, 56 (будынак ДУ «Аршанскі раённы цэнтр начнога (часовага) знаходжання асоб без пэўнага месца жыхарства»).
Акрамя таго, вызначаны два месцы масавых купанняў 18 і 19 студзеня 2021 г.:
- вёска Люціна Аршанскага раёну, крыніца святога Панцеляймона;
- горад Орша, рака Дняпро ў раёне выратавальнай станцыі па вул. Караткевіча.
Нагадаем, што 17 студзеня маразы пабілі 5 тэмпературных рэкордаў у Беларусі. Праўда, Аршаншчыну гэта не кранула, хоць раней Талачын быў полюсам холаду. Цяпер жа самая нізкая тэмпература была ў Слуцку - 28,7 градусаў ніжэй за нуль (16 студзеня - 26,8). Быў пабіты рэкорд 34-гадовай даўніны для гэтага горада. Былі абноўленыя мінімумы таксама ў Клічаве - 25,3, Езярышчы - 24, Валожыне - 21,2 і Амсціславе - 19,6.
Абсалютны мінімум ночы для ўсёй Беларусі зафіксавалі 17 студзеня 1940 года ў Барысаве. Тады быў 41 градус ніжэй за нуль. Сіноптыкі прагназуюць, што вялікія маразы чакаюцца і ў бліжэйшыя дні. Сачыце за навінамі.
