Нагадаем хроніку падзеяў: пасля выбараў і жорсткіх разгонаў сілавікамі пратэстуючых, ва ўнутраным чаце адной з гандлёвых фірмаў, якая мае прадстаўніцтва ў Оршы было абмеркаванне тых падзеяў. Некалькіх супрацоўнікаў фірмы пазней міліцыянты затрымлівалі, дапытвалі і завялі справу пра абразу супрацоўніка міліцыі. Гаворка ішла пра міліцыянта Вішнеўскага, які ў тыя дні стаў шырока вядомым у інтэрнэце. Напрыканцы лютага справа дайшла да суда і суд прыгаварыў супрацоўніка кампаніі Арцёма Кандрацьева да 1,5 гады хіміі.
Сёння раніцай стала вядома пра затрыманне яшчэ аднаго супрацоўніка той фірмы, відавочна з-за таго ж дыялогу ў рабочым чаце. Затрыманы быў Максім Шаўлінскі. Ён, праўда, прыблізна месяц таму звольніўся з кампаніі. На дадзены момант нам вядома, што Максіма затрымалі на трое сутак, а дома ў яго плануецца вобшук. Сітуацыя ўскладняецца яшчэ і тым, што нядаўна Максім другі раз стаў бацькам - у яго нарадзілася другая дачка і жонка на дадзены момант не можа дапамагчы мужу, нават, адвакатам і перадачамі, бо вымушана сядзець з немаўля.
Па стане на 16-00 Максіма Шаўлінскага выпусцілі з РАУС.
