Аляксей Талай працягвае парушаць заканадаўства Украіны, знаходзячыся на тэрыторыі непрызнанай «ДНР», а фактычна акупаванай расейскімі войскамі і прарасейскімі ўзброенымі фармаваннямі тэрыторыі Данецкай вобласці Украіны. Напярэдадні Талай яшчэ раз заявіў, ужо са спасылкай на словы Лукашэнкі, пра «айчыну ад Берасця да Уладзівастока».
Была ў Талая і сустрэча з Дзянісам Пушыліным, кіраўніком групоўкі «ДНР», прызнанай урадам у Кіеве па-за законам. Пушыліна паставілі на кіраванне з Расеі, пры гэтым нават шэраг прарасейскіх баевікоў, якія раней ваявалі на Данбасе, у прыватнасці, Ігар Стралкоў (Гіркін) лічаць цяперашняе кіраўніцтва «ДНР» і «ЛНР» «бандыцкім», якое, на іх думку, раскрадае ўсё што можна раскрасці на занятай тэрыторыі.
