Вядомы журналіст спартовага сайту «Трыбуна», футбаліст менскіх «Крумкачоў» Аляксандр Івулін выйшаў на волю. Пра гэта аршанец паведаміў у сябе ў Instagram:
«Усе гэтыя 624 дні, пакуль мы не бачыліся, вам было нашмат складаней, чым мне. Вас палохала невядомасць. Вы не ведалі, як я і што са мной. Ня ведалі, як мне дапамагчы. Пры гэтым рабілі ўсё магчымае, каб па тым боку плота мне жылося крыху прасцей. Рабілі так шмат, што я пакуль не магу ўсвядоміць увесь маштаб.
Прабачце, пішу гэты тэкст і натуральна трасуцца рукі, а да вачэй падыходзіць кандэнсат. Гэта ўсё праз вас, неймаверныя беларусы!
Нізкі паклон усім і кожнаму за салідарнасць і падтрымку. Гэта вельмі каштоўна. Гэта не забываецца.
Зусім хутка ўбачымся і пабалбочам.
Абняў усіх вас, мае харошыя», — напісаў Івулін.
Івулін быў затрыманы 3 чэрвеня 2021 года, рэжымны суд асудзіў яго на два гады калонii за ўдзел у мiрных пратэстах. Зараз Iвулiн цалкам адбыў тэрмін.
