Справу разглядалі ў Віцебскім абласным судзе. Гэта азначае, што ёсць толькі адна магчымасць абскардзіць рашэнне - толькі ў Вярхоўным судзе. Хаця па вялікім рахунку, у сёняшняй сітуацыі абскарджванне ў прынцыпе мае мала сэнсу.
А гаворка ідзе пра 27-гадовага аршанца Яраслава Казакевіча, які 8 снежня мінулага года на Орша-Цэнтральная зняў перагон расейскай вайсковай тэхнікі і быў на наступны дзень затрыманы. Абвінавачвалі хлопца не столькі ў тым, што ён зняў тэхніку (фармальна за гэта няма адказнасці), колькі за тое, што ён скінуў відэа ў тэлеграм-канал, які раней уладамі быў прызнаны экстрэмісцкім.
У выніку паседжання суддзя Галіна Бондал дала хлопцу 2 гады калоніі агульнага рэжыму. На мінулым тыдні Яраслаў быў прызнаны палітвязнем.
