Часта пра гісторыю нейкага мястэчка добра апавядаюць карціны. Пра Лёзну ёсць старая гравюра, якая паказвае важную падзею ў гісторыі мястэчка. Яна адшукалася ў архіве сям'і Малдаван і захоўваецца ў Інстытуце жыдоўскіх даследаванняў.
Назва гравюры — «Лёзна, 9 жніўня 1812 г.» Аўтар — Хрысціян Вільгельм фон Фабэр, салдат арміі Напалеона, якая ў тым годзе прыйшла на нашыя землі вайной супраць расейскай імперыі.
Афорт па малюнку альбо акварэлі фон Фабэра. Гравюра адлюстроўвае сустрэчу паміж жыдамі Лёзны і французскім войскам.
Па гравюры можна сказаць, што мясцовае насельніцтва з недаверам ставіцца да прыхадняў з Францыі. Пры расейцах было ўсякае, і там лёзненцы не ведаюць, чаго чакаць і чаго спадзявацца ад прыходу французаў.
Цікава, што вядомы заснавальнік хасідызму Залман Шнэўр, якога пераследавалі расейскія ўлады, у вайне з французамі якраз расейцаў падтрымаў. Падрабязней пра гэта можна прачытаць у падборцы фактаў пра Ляды, якія публікавала наша старонка.
Крыстыян Вільгельм фон Фабэр дзю Фор — вядомы мастак нямецкага паходжання, адвакат з асветы, які ваяваў у Арміі Напалеона ў складзе корпусу маршала Нэя. Фабэр быў лейтэнантам 2-й батарэі пешай артылерыі 25-й Вюртэмбэргскай дывізіі Арміі Напалеона. Нарадзіўся ў Штутгарце, у Швабіі, там сама і памёр. Сярод даробку салдата-мастака — карціны і замалёўкі з Бярэзіны, Бешанковічаў, Астроўны, Вільні, Лёзны, Масквы, Смаленску. Пахаваны ў Франкфурце-на-Майне каля «Altens Portal».
